泰國曼谷自由行
2006年6月7日 - 10日
人數: 一行四人包括自己, 太太, 琪琪, 舅父仔
機票: Confirmed Tickets at TG601/TG602, 前排坐位, ($1520 + TAX) x 3 + ($1150 + TAX)
酒店: Grand Diamond Hotel ($440 x 1 night + $480 x 2 nights), 另外加床 $240 x 3
目的: 太太和舅仔以Shopping 為主, 琪琪當然要找地方玩耍
推介: 胡慧沖的泰國旅遊網站 www.thailandfans.com, 好過買書睇!!
6月7日 (星期三)
上機前見有時間, 先給琪琪食早餐, 希望起飛後她會睡一大餐! 我們坐的是波音747 機種, 窗口邊有3個座位, 二人行就要留意啦!
三歲定八十, 細細個已經鍾意睇書都好……藍天白雲, 在香港真係好久不見!
因為是旅遊淡季, 一出曼谷機場就有好多出租車公司拉客, 的士站也不見一個人. 所以3:00 p.m. 我地已經到達酒店, 3:15 p.m. 已經向第一站出發 – THE PLATINUM FASHION MALL, 一個主要做批發生意的商場, 幾新幾乾淨, 在頂樓有一間好大好平的文具精品店, 值得介紹比大家, 商店旁邊仲有一間 Exchange Bank, 夠方便! 我自己就買了一個好大的 Winnie the Pooh 時鐘, 只是199B!
第二站去香港人的至愛 – BIG C Supermarket, 好好彩我都遇到這架獨一無二的小童購物車, 琪琪真係好鍾意, 由頭玩到尾, 我地先可以慢慢行!
轉眼又到晚餐時間, Urban Kitchen 的 Nara 是一個好選擇, 服務水準更是一流! 蒜蓉軟腳蟹真係好好味, 我亦好喜歡青咖哩雞, 最啱送白飯. 食完飯都只係 8 點鐘, 便順路去伊勢丹行個圈, 不過就無收獲. 但係在兒童部竟然有一個小型遊樂場!! 如果你帶過小朋友去旅行, 你就會明白有幾重要.
6月8日 (星期四)
食完酒店的早餐, 即刻去游泳池玩一陣, 雖然地方細細, 但琪琪都玩得好開心! 估唔到一個小小的泳池都有兒童遊樂場, 真係好感動, 我開始對泰國另眼相看, 人地真係好重視小朋友的需要, 唔似香港的商場同酒店…….唉!
今天第一站係 Siam Paragon, 真係又大又舒服! 在三樓的玩具部有不少遊樂設施, 一般都係 10B 玩一次, 波波池都只係 40B / 30 分鐘, 真係好平! 不過 Siam Paragon 真係得個睇字, 十足香港的 Pacific Place, 最吸引都係 Food Hall 地下那一層.
中午我地去 Siam Centre 4/F 的 ZEN 吃飯, 因為見佢的卡位比較闊, 又不用排隊, 三大一細食到好飽都只係 1500B, 真係唔算貴! 再加上琪琪飯後睡一睡, 好過做元帥, 侍應生都沒有眼超超, 好滿意囉! 琪琪一睡就兩小時, 我地埋單都三點半, 下一站就係 MBK, 中途經過 Siam Centre 的Converse Shop, 正價的九折, 睇下都唔錯! 反而 MBK 就有收獲, 連琪琪都忍唔住計一計駛咗幾多錢!
在 MBK 的商店內發生了一件事, 就係我竟然趺了銀包在一間藥房內!! 當時我買了兩罐可樂, 找錢後順手將銀包放回褲袋, 就係這一下我錯手跌咗銀包落地下而行出藥房, 幸好我在7 步之內發現, 而藥房的店員亦同時追出門口將銀包送回給我, 今次自己真係好好彩, 出門遇貴人! 晚上我們去沖哥介紹的 Siam Novatel Hotel 2/F 的 The Square 食海鮮自助晚餐, 因為有 20% discount coupon, 埋單只須 2250B, 真係好低食! 不過因為太好食, 我都忘記了影相 ^-^ !
6月9日 (星期五)
食完早餐游完水已經 11:30 a.m., 我地即刻打的去第一站 – Thailand Cultural Centre 旁邊的 Hypermarket Outlets, 包括 Robinson, Carrefour & Jusco. 點知一早就上了一架衰車, 一時又話 traffic jam, 一時又話 too far away 等廢話, 擺明拒載啦! 由於有小朋友跟身, 我當然不敢硬碰, 即刻改去 BTS 站算數, 見一落車已經係 Central Department Store, 當然又順路行一轉, 涼下冷氣都好! 這一轉大人就空手而回, 但琪琪就開心囉! 玩完仲有小豬仔一隻, 300B 算啦!
行到地下的 Supermarket, 見有老婆大人最喜歡的食物 – 泰式粉絲和榴槤, 即刻就地開餐, 雖然都要 800B, 但又幾好食呀, 旅行最緊要開心嘛! 去到 Carrefour, 即刻跟情報找尋兒童車仔, 果然平得好緊要! 10B 玩4分鐘, 琪琪玩了 6 次都依然咁開心, 真係勁!
行過隔離的Robinson, 真係 好大間! 最重要係終於搵到又平又正的鞋仔給小女兒, 連我自己最後都忍不住買了一對560B的Converse. 更厲害的是百貨公司內竟然有狗仔騎, 真係大開眼界! 晚上坐的士回到 Siam Paragon (約 70B), 太太和舅父仔又再去 MBK 殺價, 我和琪琪當然是再去兒童部消磨時間, 你睇佢個表情, 玩到投晒降!
由於時間關係, 我們膽粗粗決定在 Food Hall 吃晚餐, 在入口會每人派一張記錄卡, 當你去不同的食店買食物時, 只需要碌一下張卡就得, 仲會有專人將食物送到你的座位, 真係好方便! 我們各自點了不同的食物, 味道都唔錯, 連豬仔都話: "好味道"! 回到酒店, 我們都好興奮去迎接世界杯的開幕戰, 因為可以睇直播! 琪琪也一樣咁開心, 竟然想半夜去游水!
6月10日 (星期六)
最後一日的行程好輕鬆, 食完早餐再執好行李已經 11:30 a.m., 去完BIG C 再去 4/F 的 Food Mall 食午餐, 這間 Chester's Grill 的燒雞真係好好味, 泰國的KFC同佢真係無得揮! 飯後再去食番杯 Chocolate Dessert, 實在太感動啦!
跟住去Erawan Bangkok 買手信, 真係好香呀! 尾站再去 Central 的 Supermarket 買食物, 琪琪當然係再玩一會, 然後我們準時 4:00 p.m. 離開酒店往機場去了!
根據沖哥的貼士, 好容易就搵到 S&P, 果然好介紹, 味道唔錯!
去泰國當然會有多少收獲, 以下是其中一部份:
