日本關西之旅 2004年10月14日 - 22日
前言
日本一直是 ReBecca 和我最喜愛的旅遊地點, 由於 2002年2月我們去過東京和北海道,
今次好自然想去大阪行過圈, 亦特別安排在日本慶祝 ReBecca 的生日.
當然也少不了 BB 的一份, 因為 ReBecca 和我都不放心留下琪琪在香港. 但所謂三軍未行, 糧草先動, 出發前我們已抱著慘過美軍去伊拉克的心情.
結果呢.......果然是必須要有做烈士的決心, 我們才可以平安回來! 這一次前所未有的日本之旅, 令我們筋疲力盡,
更是我歷來最吃力的一次旅行. 在 2004年10月14日 (星期四), 我們坐最早的一班機去大阪, 對我們來說坐飛機絕對是一個大問題. 多謝上帝保守, 琪琪竟然由起飛睡到落機, 絕對係一個奇蹟!
第一天剛抵達大阪難波駅, 我難掩內心的興奮, 充滿信心迎接琪琪的挑戰!
旅遊景點
1. 天王寺動物園: 一個好好睇的動物園, 原因只有一個, 因為香港無一個正式的動物園, 明未?
不過琪琪對騎馬仔和叮噹的興趣更大!
2. 明石城公園: 坐 JR 神戶線在明石駅下車, 一個好適合一家大細去散步的地方,
琪琪可以和鴿子互相追逐嬉戲, 好開心呀!
3. 明石魚之棚商店街: 街市一個, 我們買了魚生, 燒鰻魚, 螺肉, 獅子狗回到公園坐低慢慢食,
好舒服呢! 那裡亦是一個買手信的好去處.
4. 神戶: 由於我們不喜歡在日本看外國建築物(仲要俾入場費), 所以只在元町商店街和
Harbourland一帶的商場閒逛, 都幾寫意.
特別推薦 Mosiac 的小朋友遊樂場, 有五六部好得意的動物車, 琪琪都玩得好投入, 睇過短片你就會明白!
5. 有馬溫泉: 日本三大名泉兼古泉之一, 金之湯真係正到生晒锈, 銀之湯就比較啱香港人;
名產有炭酸煎餅, 可以免費試食, 真一樂也!
6. 大阪城公園: 大阪市最大的公園, 內有一個天守閣(又係要入場費),
我們只是隨意漫步, 剩係一條長長的林蔭大道已經值得一遊啦!
7. 京都東許願寺: 由於只有三小時(仲要包埋食午餐),
所要只睇過這一間最近 JR 京都駅的寺, 雖然好殘舊, 但勝在夠樸實無花巧.
佢仲係日本現存最大的木建築物, 勁呀!
備註: 不要再問我點解唔去 Universal Studio, 你再睇多一次前言就會明白........ 你有無聽過美軍打仗會去 Disneyland?
Factory Outlet
我們共去了三個不同的 Factory Outlet, 感覺是日本人的消費力真的是恢復了, 連 Outlet 的貨品價錢也順勢提高了不少,
令我們幾乎空手而回.
1. Blossom Factory Outlet: 大阪市內坐地鐵(門真南駅)可以去到的
Outlet, 而且有 Snoopy Town Outlet, 要執平貨, 只此一家.
2. Porto Bazar Factory Outlet: 在 JR 垂水駅下車行 10 分鐘就到,
同屬三井集團, 整體感覺都算唔錯, 至於有無收穫就要睇運氣啦!
3. Rinku Town Outlet: 從難波乘南海電鐵, 關西空港前一個站落車,
由美國大集團經營, 有好多外國牌子, 連 Bally, Dunhill都有......
在其中一間 outlet 內的 Bandai 商店, 模型價錢仲貴過香港 2 成, 只有齋睇, 唉!
飲食心得
1. 由於得到一位大阪同事的熱情款待, 所以第一晚我們不用自己搵食. 他帶了我們去一間好食過和民十倍的長三郎食堂(在
Namba City 南館), 主打食海鮮料理, 味道一流!
因為餐牌以日文為主, 只有極少量圖片, 大家都係要先抄定幾句日文先好去啦!
2. 神戶市有一間燒肉店叫六甲(大阪心齋橋都有分店),
價錢公道, 神戶牛的味道亦一流; 可惜都係個句, 全個餐牌都係日文字, 最好都係先抄定幾句日文對照旁身.
3. 大阪市有一間連鎖食店叫頑固, 主打咖哩炸豬排飯,
真係好好食! 我們在心齋橋亦幫襯過其開設的迴轉壽司店, 質素也是很高.
4. 關西的烏冬比拉麵更出名, 我們一家人試個好幾間烏冬店, 真係間間都咁好食! 如果你想慳錢, 首選
300-500 日圓一大碗的烏冬.
5. 有一晚在梅田隨便找間燒肉店吃晚飯, 點知價錢超貴! 一碟特上牛肉(只有 6片)已經要 2,400日圓, 一碟雞肉(都係 6片)都賣 800日圓; 雖然大阪的霜降牛肉真係好好食, 但是埋單要 4,800日圓, 仲要係食唔飽(因為唔敢再叫),
令我們之後都不敢再來梅田食飯.
最後一天開往關西空港的火車上, 琪琪依然精神奕奕(其實才剛剛退燒 @_@), 而我就已經筋疲力竭.......個背包好重呀!
實用網址
1. 預訂酒店 http://big5.tabimado.net/
2. 明石市的介紹
http://www.city.akashi.hyogo.jp/sangyou/kankou/
3. 有馬溫泉 - 元湯龍泉閣 http://www.ryuusenkaku.jp/
4. 日本關西的介紹
http://www.kansai.gr.jp/index_t.asp
後記
大家估下相片中的飲品是什麼? 估中有獎!
